زوى الاحتياجات الخاصه

كل واحد جواه طاقه ابداعيه..كتير مننا فقدوا أجزاء من أجسامهم بسبب حادثه او مرض او طبيعه جسمه فيها اعاقه خلقيه..وده فى الحقيقه مش بيشكل أهميه كبيره لانه فى النهايه ده عباره عن مشكله ميكانيكيه

لكن الشئ المهم هوا إننا بنمتلك الروح الانسانيه والقدره على الابداع

انا هتكلم عن الكفيف علشان انا متطوعه فى جمعيه رساله نشاط المكفوفين

الكفيف محتاج لايمان منك بإنه قادر..مش محتاج الشفقه منك خالص لانه مؤمن بنفسه ومؤمن برضو بقناعه تامه إن فقدان أى شئ ده مش معناه إنه مش هيقدر يكمل حياته ..الشفقه مدمره وبتموت

الاعاقه كقدر وواقع مش بيعيب الانسان ولا بينتقص منه

الكفيف بيمتلك حواس تانيه من خلالها يقدر يلمس بيها جمال الدنيا زى مثلا الموسيقى إحنا بنغمض عنينا لما نسمع الموسيقى او لما نعزف على اله الموسيقى علشان نحس بعمق جمال النغمه

كمان الكفيف بيقدر يحس اللى قدامه من رووحه وقلبه وعقله مش من شكله او مظهره اللى بيخدع غالبا

خلى عندك الرغبه فى إكتشاف العالم بطريقه مختلفه من حواسك التانيه واللى بتبقى اصدق كتير من حاسه البصر

خلى نظرتك للحياه فيها تفائل وحب ورضا وإفتكر دايما إن الاعاقه مش فى الجسم الاعاقه فى العقل والقلب والاخلاق الجسم مجرد وعاء فيه روح وعقل وقلب

نشاط المكفوفين مش زى أى ناس دى ناس إحنا بنتعلم منهم فى الحياه

ذوى القدرات الخاصه مش محتاجه معامله خاصه لانهم هما اللى بيعرفونا يعنى إيه معنى التحدى والاراده

يعنى لو شفتك وانا مغمض وعرفت أمشى فى الشارع لوحدى ابقى بطل قاهر للظلام ابقى قادر اكتر منك لان أنا فاقد حاجه موجوده عندك وأنا عوضها بإراده قويه ابقى مش فاقد البصر زى كتير ما فاكرين نفسم بيشوفو انما عمر ما بصيرتهم شافت

رسوماتى الجميله 1

عايزه اتجوز ومش عايزه اتجوز :)

متضحكش عليا ياصديقى  الا لما تقرا وجهه نظرى الاول

اولا الاسباب إنى عايزه أتجوز

علشان بعشق"الحب" نفسى اعيش احلى قصه حب مع أغلى حبيب بمشاعرها الصادقه النقيه ..كلمه حب كلمه غاليه اوى عندى بالنسبالى احلى كلمه فى الوجود لانها بتقوى وبتحيى القلب وبترسم السعاده والبهجه فى الحياه

نفسى احب واتحب حب حقيقى  الحب اللى قلبك وعقلك يجتمعو عليه بإقتناع ..هوا اللى مهما كانت البدايل أروع تفضل شايفه أحلى من الكل ..هوا اللى متعرفش تنساه او تبعد عنه ..هوا اللى تحبه اكتر من نفسك

 

بحلم من زمان بحضن جامد بحضن يضمنى اوى من انسان بحبه بجد ..حضن متشال فيه كل الحواجز.. حضن من قلب لقلب يلمسه ..حضن ابقى محتجاه فى وقت ضعفى وحزنى وانسى فيه كل تعبى وأحس جواه بالامان
الحضن بالنسبالى هوا البوابه لنقل لكل المشاعر الحلوه اللى جوانا واللى ممكن منقدرش نعبر عنها بالكلام وبتحصل فى ثوانى وفى حيز ضيق جدااا بيندمج فيه الروح مع اللى بتحبه

 

نفسى أسمع كلام حب فيه مشاعر قويه جدااا طلعه من قلب مخلص نقى ويخلينى وقتها ابقى ف منتهى السعاده واحس انى طايره فوق السحاب وانا معاه ..ويخلينى أقدر اطلعله كل المشاعر الجميله البريئه النقيه اللى مدفونه جوايا سنين ومش عارفه أخرجها لاى حد وخلاص
مشكلتى انى بنوته رومانسيه جدااااا..جوايا مشاعر وأحاسيس تكفى العالم كله بس مخبياها علشان غاليه عندى أوى ومش هتظهر الا للشخص اللى يستاهلها بجد 

بحلم يكون عندى بيبى أعيش معاه أحساس الامومه بمشاعرها الجميله ويملى حياتى ودنيتى بهجه وسعاده..انا كل ما اشوف طفل احس بإحساس ممتع جدا وف نفس الوقت بحرمان وشوق .. وكمان بيبقى إحساس جميل لما يكون فى حد فى حياتك محتاجلك وتتعلق حياتك بحياته ووجوده بوجودك سواء للزوج او الاطفال

     
ونفسى اوى اوى نرقص سلو انا وجوزى حبيبى وأنا لابسه أحلى فستان قصير ومنفوش

من صغرى وأنا بحلم البس فستان قصير
:)

وأخيرا بتمنى اتجوز علشان اشغل الاغنيه دى فى يوم فرحى
علشان أنا زهره نيسان وأيار كمان ..وهتجوز أمير علشان أنا أميره
:)
بحب الاغنيه دى اوى اوى..انا بسمعها تقريبا كل يوم

قلِّك نعم من قلبه
وفرَّح كل الناس
ردِّيهاعَ قلبه وحبو
شعلاني احساس

وعلى فكره ياصديقى أنا بدور وببحث ومش بضيع فرصه تعارف علشان لما أكبر بعد كده  من غير جواز ماندمش إنى مجتهدش فى البحث وأرتاح نفسيا

ثانيا الاسباب انى مش عايزه اتجوز

مش عايزه اتجوز علشان الناس شايفه الجواز ده الهدف من الحياه ومش شايفه غيره مع ان الجواز ده المفروض يكون محطه حلوه من الحياه بس مش الحاجه اللى واقفه عليها

 مش عايزه اتجوز علشان الراجل فى المجتمع الشرقى بيحط ادق التفاصيل من المواصفات فى البنت اللى عاوز يرتبط بيها وطبعا حجته معاه مش الراجل لازم ياخد واحده تعفه وتخليه ميبصش لحد غيرها؟!!!!  طب والبنت مينفعش تقول إن ليها مواصفات ومحتاجه حد يرضيها ولا وظيفتها تكون لوحدها مرضيه للطرف التانى بس؟

ده للاسف بيحصل فى مجتمعنا دايما الحوار ده بيتاخد من طرف واحد "سعادتك تحب ايه فى مراتك علشان ترضى ومتبصش بره"؟؟؟ والبنت لازم تقبل من غير شروط
بس للاسف البنت هييا السبب الرئيسى للى بيحصل ده لانها بتتنازل عن حاجات كتير من حقوقها لدرجه إنها بترخص نفسها علشان تلحق نفسها من لقب العنوسه أو إن يفوتها قطر الجواز واهى جوازه وخلاص

!!!!!!!

للاسف معظم البنات كده إتربت من غير طموح فى الحياه وكل طموحها إنها توقع عريس لدرجه ان البنات دلوقتى بقت بتظهر انوثتها بشكل مبالغ فيه بس مش عشان هييا حابه نفسها ومقتنعه بنفسها اللى ربنا خلقها بيه  لا ده علشان صدقت فعلا ان انوثتها سلعه وليها تمن يعنى اللى يدفع يشيل او المهم انها تلاقى اى حد وخلاص علشان متبقاش من الاقليه المهمشه اللى فاتهم قطر الجواز.. يعنى فطرتها وطبيعتها ملهمش قيمه غير لو كان ليها مقابل 
والنتيجه

بنات أتفه ما يكون عقلهم فارغ مزلولين معندهمش ثقه فى نفسهم ولا يعرفو اى حاجه عن الحياه أكتر من إنها تتجوز وتخلف  وتطلق وترمى عيالها علشان تصطاد عريس تانى

رجاله اتفه واغبى ما يكون تفكيرهم سطحى وعندهم دايما نقص وغرور لا متناهى شايفين إن وظيفه الانثى فى الحياه هييا إمتاعهم فقط ومعاها بيشوف نفسه كامل ومفيهوش غلطه وده بمساعده التافهه اللى معاه

وأخيرا مجتمع روتينى ممل من غير أدنى طموح أو سعى أو إبداع للمستقبل

مش عايزه اتجوز علشان المكان غير صالح للاستخدام الادمى ايوه زى ما بقلك كده

انا مش قادره أخد قرار انى أعمل بيت واسره فى البلد دى لان قلبى مش هيطاوعنى أخلف أولاد فى المكان المتدنى  ده علشان ببساطه مش هعرف أسامح نفسى لما ألاقيهم مش لاقيين أبسط حقوقهم فى التعليم والصحه والحياه الاجتماعيه الكريمه اللى محتاجنها

يعنى مثلا أنا علشان أعلمهم وأحافظ على صحتهم بس هحتاج أدخلهم مدارس إنترناشونال ومستشفيات كبيره ليها إسمها وده معناه إنى ياإما اكون من كريمه المجتمع وده مش حقيقه ياإما أكون غنيه حرب وبربى قطط وكلاب وده برضو مش حقيقه 
:)

كمان مش هيجيلى قلب أخلف بنت فى المجتمع ده وأعرضها للخطر بشكل يومى فى الشارع وأخليها تكتشف مع كل يوم بتكبر فيه إنها مخلوق درجه تانيه فى بلدها وكمان كرامتها وحقوقها ممكن تنتهك عادى جداااا ومحدش يبصلها حتى لو تعاطفا

هربى أولادى إزاى وعلى إيه وإحنا حوالينا الاف التصرفات البشعه ..ده غير الاشخاص اللى هيهدموا فى كل لحظه اللى إحنا ممكن نبنيه

هنعلمهم الاخلاق إزاى فى زمن ماشى غلط فى كل حاجه ونسبهم يحسو بالغربه وميعرفوش يتعاملو بنفس طريقه ومنطق اللى حواليهم ..ولا هنضطر نمسكهم الحبل من النص علشان يعرفو يسلكو فى الدنيا!!!!؟؟؟

علشان كده وحفاظا منى على اولادى هفكر ألف مره قبل ما اجبهم للدنيا

مش هتجوز علشان حد يونسنى لما أكبر ..اولا أنا مش ضامنه نفسى إنى أكبر  ولو على الونس فالكلاب كفاءه فى موضوع الونس وتشغل بلد وأنا بصراحه من عشاق الكلاب لانها اوفى واصدق من الانسان ومخلصه ومطيعه جدااااا وملهمش طلبات خالص ومش ممكن يعكننو عليك ابدا أو يخلوك خايف ومش حاسس بالامان

كمان فى الكتب والجيم والسفر والرحلات  يعنى هتلاقى الونس فى كل مكان

مش عايزه اتجوز علشان مش من مستوايا ايوه مش من مستوايا إيه المشكله .. لغايه دلوقتى لسه ملقتش الراجل المناسب ليا ولقلبى ولطريقه تفكيرى ..ده مش غرور بس أنا رفضت الامر الواقع رفضت اى عريس والسلام رفضت جواز الصالونات رفضت الحيطه

وللعلم كلمه مستوايا دى مش معناها راجل معاه فلوس كتيره ووظيفه مرموقه وعربيه لا والله خالص..مش من مستوايا معناها مش متوافق مع قلبى وروحى وعقلى

واخر حاجه مش عايزه اتجوز علشان المجتمع المتخلف شايف إن الجواز أنتصار للبنت على غيرها من البنات ..على فكره أنا بس اللى أحدد إيه الانتصار وإيه الفشل بالنسبالى لانها يوم ما هتضلم هتضلم على دماغى لوحدى مش على المجتمع اللى دايما حاشر نفسه فى كل حاجه

على فكره ياصديقى أنا مش كارهه الجواز أنما كارهه نظره المجتمع ليه وكارهه الاسباب اللى بتخلى البنات والشباب يتجوزو علشانها .. وأنا مش هقبل يكون سبب من الاسباب دى عامل اساسى فى تدبيسى لحياه تعيسه طول العمر أو حياه أقل من اللى كنت بتمناها لنفسى

ويوم ما هتجوز  هتجوز من غير اسباب ومن غير علشان ومش هاعرف أحط كلمه بعد علشان ولا يكون فارق معايا لانها بالنسبالى مش هتكون صفقه بيحاول كل طرف فيها إنه يستحوذ على إمتيازات أكتر