رساله الى ابنى الغالى أمجد "اللى لسه مجاش"

حبيبى الغالى انا بكتبلك من الحاضر علشان تشوفه فى المستقبل

فى يوم هتقرا الرساله دى وقلبك النقى الصافى هيوصلك ليا ياأعز الناس لو انا مش موجوده معاك

انا مش عارفه حياتك هتكون ازاى والدنيا هتكون ازاى واهدافك واهداف جيلك هتكون ايه .. بس كل اللى اعرفه هوا الوقت اللى انا عايشاه دلوقتى وبعض التوقعات من المستقبل ..وانت ياطفلى الجميل هتكون فى عالم مختلف ومتطور اكيد عن دلوقتى

انت عارف انى بحبك وبحلم بيك تقريبا كل يوم ..نفسى تيجى فى اقرب وقت علشان شايلالك خطط واحلام ومغامرات كان نفسى احققها لنفسى بس الظروف كانت بتعاندنى

عارفه انى هحطك فى اختبار صعب كونك ولد فى بلد زى دى .. بس عارفه كمان انى عمرى ما هربيك خواف ماشى جنب الحيط .. انا هسيبك توصل لاخر حدود مغامراتك بثقه ام عرفت تربى ابنها صح

هسيبك تعافر وتقع وتتوجع وانا عارفه انى قلبى هيتوجع عليك بس انا هاعمل كل ده علشان عودك يجمد وتبقى راجل بجد

انا عارفه انك هتكون متمرد وشقى وعيندى زى ماما ومتأكده اننا هنتخانق مع بعض كتير بس كل ده هبقى متقبلاه ومبسوطه منه كمان علشان بعد كده يكونلك رأى وشخصيه قويه

هسيبك تحب الدنيا بطريقتك ومتبقاش خواف من حاجه .. ووقت اللزوم تأكد انك هتلاقى حضن دافى وبيت وسكن ودرع للدفاع عنك

حبيبى العملاق بقلبه انا بتمنى تكون ليك حياه كريمه غاليه انت تصنعها بإيدك وصدقنى ياحبيب ماما لو كنت معاك هساعدك بكل طاقتى علشان انت كل اللى املكه من كنز غالى فى الدنيا دى كلها

 

انا ههديلك نصايح غاليه هتكون حمايتك من شرور الدنيا .. والنصايح دى ملهاش تاريخ انتهاء دى تفضل معاك طول العمر

  اولا واخيرا خلى القرأن دستورك وقدوتك الرسل والانبياء..القرأن هيحميك ويخليك مشهور فى السما وده اهم حاجه حبيب ماما

 

إياك ياحبيب ماما توعد حد وتخلف وعدك لان ده يعتبر قسم وشرف الرجل كلمته
إوعى تقول حاجه وإنت شاكك إنك مش هتبقى قدها بعد كده ومينفعش تبقى حجتك الظروف.. لو إنت حاسس إن فيه ظروف ممكن تمنعك من إنك توفى بوعدك يبقى متوعدش بيه من الاول إوعد بس باللى تقدر تعمله واللى مهما إتعرضت لظروف مش هتمنعك من إنك توفى بيه لأن فيه ناس بتبنى حياتها على أساس الوعد ده وأحلامهم ممكن تتهد ف لحظه لو خنت الوعد
وهتلاقى فى زمانا ده معظم الناس بتوعد وتخلف وهتلاقى الكبير والصغير بيعمل ده وإوعى تقلدهم وتبقى زيهم ياحبيبى
ومش مهم إنك توعد بحاجه كبيره المهم لما توعد تبقى قد وعدك وعمرك ما تخلف بيه أبداااا

طفلى الغالى ..فى ماضى اى انسان بقعه سوده وبتجذب بكل طاقتها اى حد يبدأ يفكر فيها وتفكرك بكل ذكرياتك المؤلمه ..اوعى ياحبيب ماما تسمع صوتها لانه هيخنقك وهيوقف حياتك وهتندم لما تفوق منها .. لو بتحب ماما اوعى تفكر فى الماضى

حبيبى الغالى..متصدقش اللى بتسمعه او اللى بتقراه لان دايما بيبقى فى جزء من الحقيقه غايب .. ودى مهمتك فى انك تعرف الحقيقه كامله ولو معرفتش يبقى متحكمش على حد بنص الحقيقه او على الاقل إنصف طالما بتملك نص الحقيقه بس

طفلى الكبير بقلبه ..متكرهش حد خالص حتى اعدائك ..متشغلش جزء من عقلك على اشخاص مش بتحبها.. إشغل كل عقلك بحاجه تفيدك وتنفع مجتمعك وانس كل اعدائك وخرجهم بره حياتك واستعمل معاهم اسلوب التجاهل لان ده اقوى سلاح يدمر اعدائك

حبيب ماما الغالى ..لما تفكر تتجوز متخليش اى حد يقرر عنك .. خلى عقلك وقلبك بس هما اللى ليهم حق الاختيار ولو كنت فى حيره حاول تاخد رأى أشخاص انت بتثق بتجربته وتفكيره مش بمشاعره

واوعى اوعى حبيبى تكسر قلب بنت حبتك او تقلل منها وترخصها اوعى ياغالى ولو قررت انك تسيبها اوعى تسيب جواها جرح لان اللى وهبلك قلبه ميستحقش منك لحظه الم ووجع وجرح لان الحب اخلاق قبل ما يكون مشاعر اوعى ياحبيب ماما ..والافضل انك تختار صح من البدايه

حبيبى الغالى.. مهما عديت بأوقات صعبه بلاش تيأس بعدها لانك مع الوقت هتنساها ولما تعدى الايام والسنين كل اللى هتفتكره هييا الايام الجميله وإحساسها الحلو اللى سابته جواك واللى عمرك ما هتنساه مهما عدت عليك أيام وحشه .. علشان كده كل ما تحصلك حاجه وحشه إخلق انت بعدها علطول ذكريات حلوه علشان هوا ده الاحساس  اللى هيفضل جواك دايما

 حبيب ماما .. احيانا فى حاجات بتحصل فى حياه الواحد بتضعفه لفتره وبتحزنه وتألمه بجد  ومهمتك انك تطلعه ومتكتموش جواك علشان لو معملتش كده هتتملى شحنات سلبيه وتلاقى نفسك من غير ما تحس نظرتك للحياه اتغيرت وتبقى نظره سلبيه وسوده لكل حاجه حواليك ..هتحس بغربه بوحشه الايام ومرارها وتسأل نفسك بعد كده انا ليه وصلت لكل ده وتدخل فى دايره التوهان ومش هتعرف تخرج منها ..تعالا على نفسك وقول إن الدنيا مش بتقف على حد بتلاقى كل حاجه مشيت أحسن من الاول

خلى الايام تعمل اللى هييا عايزاه وانت كمان اعمل اللى انت عايزه  وافتكر فى الاخر انك عملت اللى عليك فمتزعلش

وعايزاك تصدق حاجه واحده بس وهييا ان التعب والالم هيروح زى ما كل حاجه راحت قبل كده..جايز هيسيب عليك علامه مش هتروح بسهوله بس هيسيب درس اتدفع تمنه وعديته وانت انضج واوعى

  حبيبى الغالى .. متتبهرش بالعربيه الغاليه والساعه والنضاره الفخمه واللبس الشيك والاماكن اللى بيقوله عليها راقيه لان ممكن تخفى وراها شخصيه فارغه وعقل فاضى ونقص كبير بيحاول يعوضه بكل ده .. وفى المقابل بلاش تقلل باللى لبسه متواضع وفقير لان ممكن تلاقى فيه شهامه ومروءه وتعفف منقرضه فى معظم الاغنياء

متخليش بريق أى حاجه يحرمك من نعمه البصيره

  طفلى الجميل..متحكمش على حد بناء على ظروفك او من غير ما تعرف كل الحقيقه كل واحد ليه قصته وحياته وظروفه الخاصه بيه لوحده لازم تتفهم ده كويس قبل الحكم عليه..فياريت متحكمش على الناس ولا تحاول تخدلهم فى سرك قرارات وتقول "المفروض وكان لازم" غلط ياحبيبى لان انت كده بتجرحه من غير قصد

ارجوك ياحبيبى إقرا كتير القراءه فيها اسرار محدش هيقولك عليهم .. لازم انت اللى تكتشفه بنفسك .. أرجوك أقرا على قد ما تقدر ويوم ما تعرف حاجات كتير هتفهم حاجات أكتر  

حبيب قلب ماما ..إكتب يومياتك بإستمرار لان احيانا بنحتاج للذكريات علشان بتكون مفيده فى بعض الاوقات .. وخليك شفاف مع نفسك ومتقلقش من حاجه خالص إعترف بكل حاجه غلط عملتها وتوب منها ياحبيبى متخجلش من اى حاجه كلنا بنغلط ومين فينا مش بيغلط!!! احنا بشر ياطفلى مش ملايكه المهم متكررش الغلط ..واعتبر يومياتك خزان اسرارك

طفلى الغالى  .. لو عايز تعرف انسان على حقيقته شوفه وهوا متعصب هيقول ايه ..شوفه فى وقت شدتك هيبقى جمبك ولا هيعمل نفسه ولا يعرفك .. شوفه بعد ما تعمله اللى هوا كان عايزه منك هيفضل معاك ولا هيمشى ويسيبك .. شوفه لما يعرف ناس جديده هيسيبك وهيمشى وراهم ولا هيفضل معاك وباقى عليك .. شوفه لما متكلموش فتره طويله هيكلمك بعتاب وإنه زعلان منك علشان مش بتسأل عليه لانه بيعزك ولا مش هيفرق معاه

 اخر نصيحه ليك ..خليك ياحبيب ماما مع المظلومين دايما مش الظالمين وخليك مع الحق دايما حتى لو كان على حساب حياتك وتأكد ان ربنا وملايكته هيكونو معاك وحواليك.. وارسم لوحه العداله فى الدنيا كلها ودمر كل ظالم..وخليك على يقين دايما إنك تقدر تغير العالم وهتقدر ياغالى واوعى تخذل قلبك أبدا حاول وعافر طول العمر ..انت قدها ياحبيب ماما

ماما بتحبك وبتعشقك ياغالى ..قولى امتى هتيجى علشان اشيلك واخبيك جوه احضانى واعيش معاك احساس الامومه بأجمل مشاعرها واخليك امير وفارس بتحلم بيه كل الاميرات ياأجمل حاجه هتبقى ف حياتى وتخلى ايامى كلها فرحه وسعاده وشقاوه