حياتى بإختصار

عاوز تعرف ياصديقى حياتى كانت ازاى؟

انا هقلهالك بإختصار من غير تفاصيل علشان لو قلتلك التفاصيل مش هتعرف تحسها زى اللى عاشها

حياتى اللى فاتت كلها عباره عن انين ووجع ومعاناه
انت لو ماشى فى طريق طويل والطريق معظمه متكسر والسليم منه مليان شروخ ومليان حفر فى كل مكان وبتقع فيها دايما

وف نص الطريق جسمك يتعب ويجيله مرض وتاخد لتعبك ادويه غلط دمرت جسمك  وتعالجها بعد كده بأدويه تانيه تتعبك اكتر وتهدك .. بس عادى انت برضو مكمل فى طريقك رغم الالم الجسدى والنفسى اللى بتعانى منه

واكتشفت وانت ماشى الطريق ان فى ناس عزيزه عليك بتتعمد تجرحك وتكسرك ونزفت منها كتير فى حياتك..بس انت برضو مكمل ومش بيهمك حد
 بس الحقيقه المره اللى وجعتك وكسرتك بجد وانت ماشى فى طريقك "ان الدنيا والقدر داست على وشك وكسرتك وجرحتك جرح عمره ما هيخف وهيفضل معاك طول العمر" ..بس برضو انت مكمل ومش مستسلم لاى عوائق وبتدعى ربنا ان بكره يكون احلى

وفضلت ماشى ومكمل الطريق بس بعد ما مشيت مسافه طويله اوى اكتشفت انك ماشى فى الطريق الغلط طريق نهايته سراب وسواد ليل مفيش فيه قمر ينورلك طريقك

وقدامك حل من اتنين ياإما ترجع تانى وده طبعا مستحيل لان رجوعك معناه نهايتك وموتك ياإما تكمل فى السراب والليل الموحش وانت وحظك ياإما تتوه واحتمال تقع وتنتهى حياتك ياإما تنجح وتوصل لنهايه الطريق الغلط اللى مش بتاعك ..بس فى النهايه برضو اديك وصلت لبر الامان اللى كنت بتتمنى توصله فى بدايه طريقك

الحقيقه الصعبه ان مفيش قدامك اختيارات كتيره بس الحقيقه الاصعب من كده ان الاحتمالات كانت كتير اوى اوى اوى وانت تايه وخايف ومش عارف تعمل ايه

دى كانت حياتى باختصار

فهمتها ياصديقى ؟

طب خلينى اوضحلك اكتر

المشكله اللى بعانى منها دلوقتى هييا تفكيرى فى الوقت اللى ضاع منى فى ولا حاجه .. فى الطريق اللى خد منى سنين طويله والمحصله صفر.. فى الغدر والخديعه والاذى اللى دمرتنى وضيعتنى للابد ونهت اللى باقى من عمرى .. وده لازم تفكر فيه غصب عنك علشان والله بتبقى صعبه اوى لما حاجه تكون كبيره عندك  ولما تيجى تفتكرها بتبقى كل حصيلتها صفر ومش بس كده لا ده كمان خد عندك كميه الغدر والخداع والكدب والصعوبات والالم والجرح والنزيف والمعاناه والوجع اللى علم عليك ومش هيسيبك خالص وانت ماشى فى طريقك وكل ده عشان عندك امل مزيف انك ممكن توصل للمكان الصح وترتاح

       :(       

وف يوم من ايام توهانى وحيرتى اللى بحس بيها دلوقتى خدت صورتى ووقفت قدام مرايتى علشان اتأكد ان انا لسه انا وفعلا لقيت شبه بسيط بس لاقيت اختلافات اكتر 

يمكن زمان كنت انا الحقيقيه انما دلوقتى بعد ما مشيت فى طريق مش بتاعى بحاول انى اكون انا 

بس عارف ايه المشكله؟؟

المشكله انى مش فاكره اوصافى الحقيقيه .. مش فاكره طريقه تفكيرى الحقيقيه .. مش عارفه انا كنت مين وبقيت كده ازاى .. مش عارفه انا رايحه لفين ولفين واخدانى دنيتى 

بقيت تايهه من نفسى .. خايفه اوى من بكره 

بحاول انسى امبارح ومش قادره علشان ليه توابع كتير معايا ومعلمه عليا وكل فتره بتنزف وبتكسرنى

اوقات كتير بحس انى بدور على حاجه ومع الوقت احاول افتكر ايه اللى كنت بدور عليه الاقيه ضاع منى .. ويمكن انا فى الاساس مش لاقيه حاجه ادور عليها 

او يمكن فى الاصل انا بدور على نفسى ما بين صور مرسومه فى خيالى كنت فاكره ان فى صوره منهم ليا

صح ..هييا دى الحقيقه .. انا فعلا بدور على نفسى اللى الزمن جت عليها وبدل ما ترفعها لسابع سما نزلتها بكل غل وكره لسابع ارض

وطال الطريق وكبرت المسافات ما بينى وبين نفسى وبرضو لسه مستمره انى ادور عليها ما بين اوراقى وايامى وحياتى

وكل اللى لقيته لغايه دلوقتى هوا اسم مكتوب وصوره جنبه بتقول ان ده انا 

اللى هييا بطاقتى الشخصيه ياصديقى 

انا احلى حاجه بحبها فيا دلوقتى انى لسه قادره اضحك .. هييا صحيح مش من قلبى بس ادينى بضحك وخلاص