بصراحه انا بعشق رومانسيه توم هانكس فى أفلامه وفى حياته الخاصه برضو وبتمنى ألاقى إنسان شبه رومانسيته العظيمه
سر عظمه توم هانكس إنه ممثل مش بيقوم بأدوار جباره وقويه هوا بكل بساطه بيمثل أدوار الرجل الطيب العادى بيمثل شخصيته الحقيقيه الراجل البسيط اللى شبه ملايين الرجاله فى العالم
علشان كده لما بيقدم أدوار رومانسيه بتكون تلقائيه ونقيه واللى بيتفرج عليها بيحسها وبيعيش معاه أجمل وأوفى مشاعر طالعه من قلب نقى وكمان بسيطه ترقى للحقيقه اللى المفروض بنعيشها فى حياتنا وأنا بقول كده علشان معظم الافلام بتبقى فيها رومانسيه مأفوره أوى
لكن الحب الحقيقى الحب اللى فيه وفاء وإخلاص حب نقى حب غالى طالع من القلب ده اللى بنشوفه فى أفلام توم هانكس
وعلشان اوضح ليك أكتر خلينى أعرض مشهدين ل توم هانكس من فيلمين ونشوف الرومانسيه العظيمه والحب الحقيقى بجد
أول مشهد من فيلم
cast away
لما توم هانكس كان فى جزيره معزوله وقعد فيها 3 سنين وبعد ما رجع لوطنه عرف للاسف إن خطيبته إتجوزت وخلفت ..ساعتها فضل يحكى لصاحبه عن إن الحاجه الوحيده اللى خلته عايش على الجزيره لوحده لمده 3 سنين هوا الامل إنه ممكن يرجع يشوف حبيبته من تانى
هييا بصراحه إنسانه متستحقش واحد جميل وفى زى ده
انا لو كنت مكانها انا عمرى ما أفكر الا فيه حتى لو مرجعش فكفايه هيبقى عندى الامل ان ممكن يرجعلى فى يوم وهيبقى قلبه وروحه موجودين جوايا وف كل مكان للابد
تانى مشهد فيلم
The terminal
الفيلم ده رائع جدااااااااااااا بحبه بجنون
الفيلم بيحكى عن راجل مسافر من بلده ورايح لمدينه نيويورك وأول ما وصل المطار اكتشف إن بلده حصل فيها إنقلاب وقامت فيها الحرب
فالسلطه اللى ف مطار نيويورك منعته إنه يخرج من بوابه المطار وفضل محبوس فى صاله المطار لا عارف يرجع بلده ولا عارف يخرج من بوابه المطار وفضل على الحال ده 9 شهورلحد ما الحرب إنتهت
لكن فى ال 9 شهور اللى قعدهم فى المطار حصلتلو فيها حاجات كتيره منها دراميه ومنها مضحكه ومنها رومانسيه.. إحنا دلوقتى هنتكلم عن الرومانسيه
فيكتور اللى هوا توم هانكس وقع فى حب إميليا مع إنهم مشفوش بعض إلا اربع مرات لكن هوا حبها حب حقيقى حب مفيش فيه مصالح حب نقى اوى لكن هييا للاسف حبته حب مصلحه
المهم ان هوا حبها وكان مهتم بيها وبيركزعلى كل حاجه هييا بتحبها ..ومن كلامه معاها عرف إنها بتحب قصه حب بونابرت وجوزفين.. فالمهم فيكتور قرر إنه يقرا عن الموضوع ده وقرر إنه يعملها الحاجه اللى بتحبها بالطريقه اللى يعرفها .. فبنى صوره مصغره من هديه نابليون بونابارت لجوزفين والهديه عباره عن ألف نافوره
ياااااااااااااااه على جمال اللقطه دى ياصديقى والله بدمع كل ما بشوفها
وبعد كل ده سابته
واللى حزنى أكتر فى الفيلم نظراته الحزينه وهوا بيشوفها ماشيه مع حبيبها اللى سابها ورجعلها تانى وهييا استغلت فيكتور الفتره اللى كانت فاضيه فيهم
والله والله أنا مستعده أدفع عمرى كله فى مقابل ألاقى شخص زى فيكتور بطيبه قلبه وحنيته وإخلاصه الجامد للناس اللى بيحبهم وأحبه بس يوم واحد وبعد كده أموت عادى ..عمرى كله مش هيبقى خساره فيه لان أنا عارفه ومتأكده انه حبه ليا هيبقى حب حقيقى
هوا ده نموذج الرومانسيه العظيمه اللى الناس كلها ممكن تشوفها عاديه وبسيطه ودى الناس اللى مش بتعرف معنى الحب الحقيقى بس أنا شايفاها إن دى من أعظم الرومانسيات اللى فيها حب حقيقى بجد حب نابع من القلب حب تتجلى عظمتها فى التفاصيل الجميله الللى كتير مش بياخدو بالهم منها وهييا فى الحب اللى مبنى على العشره والموده فى الحب الصافى الشفاف اللى مليان وفاء وإخلاص وأخيرا حب خالى من المصالح خالص
هوا ده نموذج الرومانسيه العظيمه اللى الناس كلها ممكن تشوفها عاديه وبسيطه ودى الناس اللى مش بتعرف معنى الحب الحقيقى بس أنا شايفاها إن دى من أعظم الرومانسيات اللى فيها حب حقيقى بجد حب نابع من القلب حب تتجلى عظمتها فى التفاصيل الجميله الللى كتير مش بياخدو بالهم منها وهييا فى الحب اللى مبنى على العشره والموده فى الحب الصافى الشفاف اللى مليان وفاء وإخلاص وأخيرا حب خالى من المصالح خالص
