مكعب السكر حواليك وف كل مكان

سكر

كلمه بنقولها لما نطلب قهوه أو شاى أو أى مشروب بنحبه بنحط السكر اللى على مزاجنا والكميه اللى محتاجينها علشان نحس بحلاوته

وزى ما ممكن نقدر نزود السكر على المشروب على قد ما نحتاج من حلاوه .. فى ناس فى حياتنا هما السكر اللى بيسكرو أياما وبيحلو حياتنا وبيخلو ليها نكهه مميزه

السكر اللى بره ممكن يكون 

  فى إبتسامه حد انت بتحبه وبتقدره  ويغنيك عن كلام كتير
فى إنك لسه تلاقى الامل جنبك اول ما تصحى بياخد ب‘يدك ويعينك على اللى هتشوفه فى يومك
فى حبه صبر حبه حماس بتدور عليهم جوه تفاصيل حياتك
ففى نظره فلسفيه عميقه تكتشف فيها إن مفيش حاجه تستاهل
فى هوايتك الحلوه اللى بتقضى فيها وقتك وتستمتع بيه وعلى قد ما بيكون الوقت ده قصير بس بتحس إنك لقيت نفسك وإرتحت شويه من تعب الرحله وهتقدر تكمل مشوارك بمتعه

 فى لفته حلوه منك لاى حد حواليك حتى لو كانت ورده أو ضحكه رقيقه صبحت بيها على حد فى طريقك وغيرتله إحساسه بيومه

  فى إخ عزيز بنرتاح فى الكلام معاه أو حتى الكلام عنه مع الناس ولما بييجى سيرته بننبسط ونحس بتغيير بسيط فى مود الكآبه المسيطر على كل حاجه

  فى صديق وفى حنين بيسأل ويطمن علينا من وقت للتانى ومهما بعدنا هوا فاكرنا حتى لو بكلمه بسيطه وكل مده بيفكرنا بنفسه إن هوا حته السكر اللى بره واللى حلت يومنا

مامتك أو باباك  وانت بتسمع منهم أحلى دعوه تنور يومك كله

  فى ذكرى حلوه وإنت قاعد بتشرب أحلى فنجان قهوه جنب النيل ساعت الغروب وفكرتك بلمه حلوه مع ناس جميله فى يوم من الايام أو حتى صوره ليك بتجمعك بيهم تطلعها وتسلم على القلوب الحلوه

  فى زوج طيب حنون وفى مخلص بيحبك بجنون مهما شغلته هموم الشغل والحياه يرجع بسرعه بيته ويحضن مراته وأولاده ويدخل يساعد فى أى حاجه فى البيت حتى لو هيوض السفره معاها

السكر اللى هيحلى حياتك موجود فى كل حاجه حواليك بس إحنا مش شايفينه ودى مهمتك إنك تدور عليه لان أكيد كلنا محتاجينه فى حياتنا كل يوم 

لازم يكون فيه حته سكر بره ليومنا المشحون عشان يدينا الجرعه يانبدأ بيها ياننهى بيه يومنا وأكيد هيفرق معانا كتير ومع غيرنا اللى إخترنالهم يكونو هما حته السكر فى يومنا

السكر حلاوته فى الناس الغاليه اللى حوالينا اللى موجودين معانا وبيحبونا واللى ساعات فى عز الزحمه والمشاغل بننساهم بس أكيد بنرجعلهم تانى