عدت سنه مليانه ذكريات موحشه وكئيبه..وفيها برضو ذكريات حلوه..عدى من غير ما يحققلى أحلامى زى إخواته أو يدينى حبه أمل للسنه الجديده..عدى وساب روح خايفه من بكره..فكر تايه ما بين الماضى والحاضر والمستقبل..عدى وقلبى مرعوب وبسأل نفس السؤال كل سنه "إيه هيكون مصيرى السنه دى؟"..ياترى هتبقى فيها دمعه يأس ولا دمعه فرحه..ياترى هيكون فى وداع وفراق؟؟..ياترى مين اللى هيخذلنى..ياترى مين اللى هيخلينى اندم ..مين اللى ممكن يسعدنى ويخلينى فخوره بمعرفته....أسئله كتيره جوايا
وتسألنى روحى..ياترى ممكن تحصل معجزه تهز كل كيانى ووجدانى وتتحقق كل أمنياتى واحلامى البريئه والبسيطه؟
ياترى ممكن اقابل حب حياتى ويفضل معايا دايما ويخلينى طايره فى السما والمس نجومها وابوس قمرها واحضن ليلها وتطلع الشمس على ابتسامتى وتغرب على ضحكاتى والزمن يتصالح معايا وقدرى يحلو ويلغى من حياتى الوداع والفراق والدموع والجراح؟؟
وبرغم كل ده انا برضوهبتسم لبدايه العام الجديد
بس ياترى هتبقى دى ابتسامتى الاخيره ولا هتبقى فيه ابتسامات كتيره هتيجى بعد كده؟؟
ياترى أنا خلاص بقيت فى نهايه الطريق ولا نص الطريق ولا لسه هبدأ الطريق؟؟
ياترى دموع الحزن هتنتهى ودموع الفرحه هتيجى اكيد بكره؟؟
31/12/2020
6:15 PM
2021
ياترى هيبقى فيكى ايه؟؟
خايفه اوى من بكره
