رساله من أمجد الى غاده

 أميرتى وملاكى الجميل غاده
أنا بكتبلك من الحاضر علشان تشوفيه فى المستقبل

يمكن قلبك موجوع وحزين..يمكن حاسه ان فيه سوء حظ ملازمك دايما ..عارف ان كلمه احلام مبقتش احب الكلمات لقلبك زى ما دايما كانت..بقى عندك شعور بالهزيمه والاحباط..وأمنيتك الوحيده إن يومك يعدى بسلام وتنامى

بس أنا عايزك تصدقى حاجه واحده إن التعب والالم هيروح زى ما كل حاجه راحت قبل كده..جايز هيسيب علامه..بس هيسيب درس اتدفع تمنه وعدتيه وانتى انضج واوعى

انا مش هوعدك ياغاده إن الحزن ميصيبش قلبك تانى ولا إن الحاجات الوحشه تبطل تحصل ولا إن عمرك ما تحسى إن فيه حد خذلك أو متعرفيش تحققى حلمك تانى علشان إنتى كبرتى وبقيتى فاهمه إن ممكن يحصل تانى وتالت ورابع وعلى فكره دى مش صوره سوده ده قانون الحياه

أنا ممكن بس اوعدك إنك هتقومى رغم كل الاحاسيس اللى انتى حساها دلوقتى ..دلوقتى انا واثق فى قدرتك على المواجهه والتغلب على اى صعب يقف فى طريقك

اوعدك ان بكره ده بتاعك إنتى وبس ..إرسميه ولونيه وابدعى فيه واعملى فيه كل حاجه كان نفسك فيها وتأكدى إن حزنك هيصغر وهتصحى فى يوم بتحاولى تفتكرى تفاصيل كانت هييا متحكمه فى حياتك زمان

اوعدك إن طول ما انتى قادره تشوفى إنك قدها هتبقى فعلا قدها..حاولى تصاحبى الحزن متخليهوش يتغلب عليكى لانه رفيق دائم فى الدنيا ..اتعلمى منه وبلاش تكرهيه لانه فى الغالب هيكون صاحب الفضل فى إعاده إكتشافك لنفسك والناس وكل حاجه فى حياتك

واهم حاجه فى كل الحدوته دى إنتى اوعى متبقيش شبهك اوعى ترفضى التغيير رغم خوفك منه خليكى عارفه وفاهمه إنها رحله مش سهله بس إحنا بإدينا نخليها وحشه او نخليها ليها قيمه ..ودايما حاوطى نفسك بشبكه دعم تسندك واختاريهم بعنايه علشان دول هيبقو اهم اختيار فى حياتك

متزعليش على سنين راحت منك ولا على اشخاص إختارت البعد والغياب..إنجحى فى مجالك واثبتى للى حواليكى إنك قدها وإنك مكمله رغم الصعاب 

وأخيرا اوعى تزعلى قلبك الابيض النقى ..كل ما تتصدمى بواقع اللى حواليكى ونظرتهم المتواضعه اللى بتدل على عدم فهمك صح إتأكدى إنك على الطريق الصح وهما اللى غلط بكل تأكيد
وانتى ياغاده من أجمل وأحن القلوب اللى قابلتها فى حياتى وف كل الظروف والاوقات الصعبه اللى مريت بيها عمرى ما هنسى بسمتك اللى دايما على ملامحك الرقيقه ورقه كلامك وزوقك الرفيع اللى بيخلى كل اللى حواليكى بيظنو كل الظنون الوحشه وده لسبب بسيط جدا علشان إفتقارهم لوجود نموذج طيب ومحترم زيك فى حياتهم ..إفتقارهم لقلب عنده سلامه نيه مع ناس معظمهم عنده سوء نيه
خليكى زى مانتى زى ما عرفتك دايما نسمه حب جميله بتنشر عبيرها فى كل مكان وأوعى تترتدى أبدا فى إنك تكسبى أكتر فى الطيبه والصفاء والنقاء حتى لو إتعاملتى مع أكتر الناس خبث ورياء وشر

أنا اسف ياغاده إنى ظهرت فى حياتك..اسف انى كتبت عنك اول واخر مره بكل صراحه

انا وانا بكتبلك الرساله دى بكتب النهايه اللى تليق بيكى النهايه اللى تعتبر نهايتى وبدايه حياه جديده من غيرى 

بحبك ياغاده بحبك ياملاكى الجميل ابو قلب نقى ورقيق

أمجد

يوم
29/4/2015

 

ولحظه حب عشناها نعيش العمر تسعدنا..ومين يقدر فى يوم  ينسى شعاع اول شراره حب 

كيف ايقظت هدوئى ياسيدى

ما سر حبك فى قلبى..كيف اتقنت احتلالى..كيف عرفت مفتاح قلبى وسر روحى..كيف فزت بحبى واصبحت اثيرى وفؤادى..كيف ايقظت هدوئى بجنون حبك فتغير ملامح الكون من حولى وتجملت الدنيا بألوانها الزاهيه ورسمت السعاده والامل فى داخلى وجعلت لحلمى طعما مختلفا..والاجمل انك اصبحت انت رونق احلامى وجمالها وسر سعادتى

انا احبك..فحبك من جعلنى اتمرد على مشاعرى المدفونه داخل اعماقى

وعشقك من جعلنى اتراقص على اوتار حبك بأعذب الالحان واجمل النغمات ..وجعلتنى انثى مثاليه فى عشقها

بدخولك حياتى جعلتنى فى حاله عشق دائم..فأذقنى جنون الحب دائما ياسيدى وحبيبى