فتاه الربيع والشاب نيسان

مش عارفه ليه طالبه انبساط معايا النهارده ياصديقى ..صاحيه من النوم فرحانه ومتحمسه اوى للحياه عاوزه ارقص واغنى واعزف اجمل الالحان..اه صحيح ..منا مولوده فى الربيع"نيسان" اجمل شهور السنه

انا كمان حاسه دلوقتى ان مفيش منى اتنين..ايوه انا فعلا حاجه نادره ومستحيل تلاقو حد شبهى..على فكره دى مش شكرانيه فى نفسى لا سمح الله ..بس اصل انا بت مسكره اوى وعسل  ياناس :)

بمناسبه شم النسيم ياصديقى والدنيا ربيع ولذيذ
النهارده افتكرت فيلم كارتون شوفته من زمان كان بتكلم عن اميره عاوزه زهور النرجس البرى فى الشتا..فعملت مسابقه وقالت انها هتدى وزن "سله من الزهور النرجس البرى دهب" للى هيعرف يجيب الزهور دى
ملحوظه زهور النرجس بتظهر فى فصل الربيع
وطبعا لازم يكون فى اسره طماعه وجشعه واكيد برضو هتكون معاهم بنوته يتيمه عايشه معاهم وبتخدمهم
والاسره قررت انهم يرمو البنت فى وسط الغابه الموحشه المليانه بالتلج علشان تدور على زهور النرجس البرى
وفضلت البنت تمشى كتير فى وسط الغابه لحد ما تعبت ووقعت من الاهاق واغمى عليها
بعد ما فاقت لقت اضاءه جايه من بعيد فقامت بسرعه ومشيت لحد ما وصلت لمكان النور اللى موجود جوا كهف..دخلت الكهف ولقت فيه 11 راجل قاعدين حوالين النار..وطلعو ارواح شهور السنه
البنوته اليتيمه طبعا حكت القصه ليهم وف الاخر قررو يساعدوها على انجاز مهمتها
وبطريقه سحريه اتغير الجو فى الغابه من شتا لربيع
وكان ما بين ال 11 روح "الشاب نيسان" شاب ناعم الملامح ونظراته ساحره وصوته رقيق وجميل..قرر الشاب نيسان يساعد البنت وفعلا انبت ليها زهور النرجس البرى فى كل الغابه وسابها تجمع كل اللى هييا عايزاه بابتسامه رقيقه وقلب طيب وحب وحنان
ورجعت البنت لبيتها بفرحه وسعاده 

انا حكيت القصه دى علشان كل ما ييجى الربيع افتكر نيسان الشاب الجميل

كل اللى بحلم بيه دلوقتى انى الاقى نيسانى الملاك الجميل اللى يقدر يحققلى كل اللى بتمناه ويحبنى باخلاص ووفاء طول العمر ومن غير شروط

بتمنى الاقى نيسانى اللى يقدر يحرك فصول السنه بطريقته السحريه..يقدر يخلى كل سنين عمرى ربيع دايما..وتبقى الحياه معاه بمبى وزهور وحب وعشق وفرحه وسعاده طول العمر

هل تعلم عزيزى الرجل ان نكد وكآبه المرأه ده انعكاس لتصرفاتك..بمعنى ان انت اللى بتتحكم فى مود المرأه

تفتكرو ليه بنات اوروبا مش نكديين

انا هقولك ليه

علشان مشاعر واحاسيس ورومانسيه الرجل الغربى مختلفه بشكل كبير عن الرجل الشرقى..بمعنى انهم بيعرفو ازاى يتعاملو مع الست كأنثى..وده شئ المجتمع العربى مش بيعرف يعمله"معظمه مش كله علشان مظلمش


نيسان وفتاه الربيع

اجمل رقصه من اجمل حبيبين..نظراته ليها ساحره ورقصهم خيال

الفيديو ده بيفكرنى دايما بالربيع وخاصه يوم شم النسيم

علشان اول مره كنت بتفرج عليه كان يوم شم النسيم ف 2014 

عن نفسى

اهلا صديقى ..اسمحلى اعرفك بنفسى

           انا بنوته جميله ورقيقه وهاديه والابتسامه دايما على ملامحى ..بحب الاعمال التطوعيه بتخلينى اسعد واحده..بعتبر نفسى انسانه متفائله مهما كانت الظروف..بحب الحياه وبحب منير عشان غنى عن الحياه..
بحاول اعيش حياتى على حسب اقتناعاتى بالرغم من كميه التناقضات الكتير الموجوده فى الحياه حواليا دلوقتى واللى بتضايقنى كتير بس بحاول اتعامل معاها وبعافر

     

بحب ابقى غير كل البنات مش عايزه ابقى زى بنات اليومين دول كل همهم انهم يهتمو بنفسم علشان يعرفو يصطادو بيه عريس وخلاص وكل الاهتمام يروح بعد الجواز..انا لا.. انا بحب اهتم بنفسى وبعقلى كمان بحاول اطور من عقلى علشان بالنسبالى الست مش مجرد شكل وجسم جميل وبس لا هييا كمان عقل وفكر وشخصيه

انا بنوته قاهريه جدااا واصولى من الاتراك بحب القاهره وشوارعها ..بعشق النيل وقت الغروب مع فنجان قهوه وكيس مارشميلو بيبقى الموضوع ساحر بجد..وبحب احكى للنيل كل تفاصيل حياتى بلغه الصمت اللى احنا الاتنين فاهمينها كويس وبحس بعدها براحه غريبه عشان كده مش متصوره حياتى من غيره الحقيقه

عندى مشكله فى النوم تقريبا حياتى متلخبطه ساعات انام الصبح وساعات انام بليل واوقات مش بنام خالص .. بحب اوى الليل والسما والنجوم والهدوء بصراحه الليل بيخلينى افكر واطلع حاجات كتير من دماغى مش بتطلع الصبح خالص يعنى تقدر تقول انى كائن ليلى 

بحب اسمع ميوزيك واغانى عربى و اجنبى على حسب المود بتاعى يعنى كل حاجه وليها التيست بتاعها .. بحب اسمع نجاه وعبد الحليم واليسا ..وفيروز الصبح ..والاجنبى بحب اديل وريهانا وسيلينا وإد شيران

بحب اهلى جدااااا بحبهم بجنون ومقدرش اتخيل حياتى من غير حد فيهم..بس يمكن عندى مشكله فى انى اعبر عن حبى ليهم لان ساعات خجلى بيمنعنى انى اقولهم بحبهم بس تصرفاتى بتدل طبعا على انى بحبهم بجنون

 

بحب القرايه والثقافه بكل انواعها عندى كتب كتيره..بحب اكتب خواطر لما بكون لوحدى سواء كنت فرحانه متضايقه ..بحب ارسم  وبرسم حنه برضو..بتعلم العزف على اله الفلوت..بحب الرياضه موت وبروح الجيم دايما لانه مكانى المفضل وبلعب فيه ملاكمه .. بعشق المغامرات بحب اجرب اى حاجه جديده حتى لو كانت صعبه او فيها خطوره  
وبحب اوى الرقص الشرقى وال slow dance و zumba dance

اتصدمت فى ناس كتير واتخدعت من ناس اكتر يمكن علشان انا طيبه وعندى حسن نيه فى اى حد بقابله بس من كتر الصدمات تقريبا فقدت الثقه فى اى حد اقابله وخاصه فى الارتباط لان بخاف افشل فيه  بس عندى امل اقابل شخص يغير نظرتى للحياه

 بكره الناس اللى بوشين واللى بيتقرب علشان عاوز مصلحه واللى بيعلى صوته
بكره الظلم وبكره اشوف حد بيظلم بنى ادم ومستعده اموت نفسي علشان ارجع حق حد مظلوم..

مش بفقد اعصابى بسهوله ...بس لو حد خلانى اوصل للمرحله دى يبقى تاكد انه اسوأ انسان على وجه الارض

الحمد لله عندى هدوء فى الحوار ومستمعه جيده وعندى القدره لتقبل كل الارء واى فكر يختلف مع فكرى ما دام اللى بيقول الفكر ده بيقوله بصوره محترمه من غير تسفيه لاراء الاخرين او من غير اعتقاد ان رايه بس هوا الصح والباقى غلط

مش بعرف اكسف اللى قدامى او احرجه بالذوق وباجى على نفسى كتير وده بيخلينى اقع فى مشاكل كتير فى حياتى

  وفيه ومخلصه جدا مع الناس اللى بحبهم ..اصحابى كانو بيقولو عليا القلب الطيب

بس فى اربع حاجات إستحاله يكون ليهم فرصه تانيه عندى ولو حد عمل فيا حاجه من الجاتين دول بخرجه من حياتى للابد وبلا رجعه وممكن ادمره .. الخيانه والغدر والخديعه والاهانه

 

انا عشت فتره ف حياتى كانت صعبه اوى عليا.. وكانت السبب ف انى معرفتش احقق معظم احلامى وضيعت منى حاجات كتير مش هتتعوض..بس المهم انها طلعت احلى ما فيا
علشان كده امنيه حياتى اعيش عمرى الى جاى حياه زوجيه فيها استقرار وحب وهدوء واخلاص ابدى.. وطفلين يملو علينا بيتنا الجميل سعاده وفرحه ..بيهم احس معاهم بأمومتى ونعيش معاهم طفولتنا من تانى..احساس جميل ان يكون حد ف حياتك محتاجلك وتتعلق حياتك بحياته ووجوده بوجودك.. "امجد ورهف" اولادى فى المستقبل ان شاء الله

انا من مواليد شهر مايو يعنى شهر الربيع علشان كده انا طبعى ربيعى جدا بمعنى انى متفائله وبحب الحياه .. ومن الاخر كده انا والنكد دونت ميكس بنكره بعض موت

بحب ايامى تبقى ربيع وورد وحب وسعاده وشقاوه ومغامرات حلوه وشويه جنون

شخصيتى لذيذه  ومرنه الى حد ما .. هاديه ورقيقه وزوق جدا ..حالمه شويتين وبحب اعيش بروح طفله مش عايزه تكبر

عموما متحاولش تصنفى علشان فى الاخر هفاجئك

ملحوظه..انا كنت عامله مدونه زمان من 2007 وبالاسم ده برضو بس قفلتها